你日日返工做到得返半條人命，到咗呢一刻你辛辛苦苦儲到10萬，又想改變一下方法去賺錢，想辭職，但可以做d乜生意賺錢？其實有好多嘢生意可以唔使10萬就可以開始。

 

呢度有10個做生意賺錢方法，全部都唔使10萬蚊就可以開始：

（一）送外賣網站

我唔係叫你揾間餐廳做，再幫人送外賣。而係自己起個網站，開始你個外賣皇國。香港有好多懶人唔煮飯，又懶得落街，但屋企附近想食嘅餐廳又唔送外賣，呢個時候你就可以幫呢類懶人送外賣，每次多收10蚊8蚊就得。但點解我話要起個網站？因為咁樣你可以等d懶人用信用卡俾咗錢先，你先去買外賣。而如果你網站做得好，你可以鼓勵餐廳付費係你個網站登記先可以接受外賣單。唔識整網站？上Fiverr俾$5叫人幫你整就得。

（二）接送小朋友

大家都知道香港地好多父母都要返工。小朋友9點鐘先返學3點鐘就放學，好多時父母因為要8、9點返工，5、6點先收工所以要揾其他人幫手接送小朋友返學放學。其實呢類父母都願意俾1、2千蚊一個月（包括我自己）揾人接個仔返學放學再睇住小朋友兩三個鐘頭。

（三）整糖水送上門

如果你識得整糖水，你可以係你自己住個屋苑派下傳單宣傳你可以送外賣糖水。一開始你可以做幾款簡單試下先，例如：紅豆沙、綠豆沙、腐竹鷄蛋糖水、番薯糖水、芝麻糊。你只要做下午6點到12點都夠你做。

（四）翻譯服務

唔係叫你幫人翻譯成本書，而係幫人翻譯一段100-200字都（英譯中）都已經可以賺100幾十。外國現時好有需求要揾人翻譯網頁，如果你中英文水平係一般以上就已經可以做。我推介你登記Fiverr，世界各地都有人係Fiverr揾緊中文翻譯服務，基本上你一登記就差唔多馬上有Job。

（五）神秘客服務

香港好多大公司或者連鎖店都需要有神秘客戶去佢地鋪頭或者打電話去call centre測試自己員工嘅服務質素。係香港，提供神秘客服務嘅公司唔多。如果你成立一間提供神秘客戶服務嘅公司，再揾到5-6間個穩定客戶，你就已經好過打工。一開始時可能你唔夠人幫你做神秘客戶，你可以辛苦d自己做住先。可能你會問，你可以賺幾多？公司都會俾$200-$300蚊做一次，但好少會做一次，一般都會同你簽半年或一年，而每個月要有5次或以上。當然你要提供埋個報告俾間公司。

（六）網店

香港有個優勢就係近廣州，廣州有好多唔同貨品嘅批發商，供應商。你只要入啱貨就可以上網賣嘢。一開你可以唔使自己起個網站先，可以先開個ebay戶口試下個市場，之後再自己開網店（如果要自己開網店的話，我建議大家用Shopify平台）。外國因為地方太大，有好多住得比較偏僻嘅居民因附近冇商場而上ebay購物。大家可以參考一下我另一文章：Shopify教學：如何運作、價錢比較、網店平台比較。

（七）婚禮策劃

如果你自己都係已婚，同埋都做過兄弟姐妹的話，你一定已經非常熟識成個結婚流程。你可以幫人策劃婚禮，既可以幫人，又可以當一門生意咁做嚟賺錢。

（八）接線生服務

可能你唔知道，好多自顧人士或者細公司都係由日頭忙都夜晚，根本冇時間接電話。又或者想間公司睇落好似專業d，但由唔想請個全職做reception。你可以開間公司幫呢類人士或公司接電話解答簡單查詢或者落單。收費可以係按照每個call計算。

（九）清潔公司

相信呢樣嘢我都無需要解釋係咩嚟。我身邊好多朋友都差唔多沒個月都要揾人清潔間屋。我估計個需求都幾大。

（十）補習社

一開始做住上門補習，到客戶越來越多後，你就可以考慮租個鋪位嚟做。開補習社可以話係無本生利嘅生意。

 

以上只係一些概念。係咪成功就視乎你開始前有冇做好research。如果有心做，做生意賺錢應該係可以多過打份工，但係想靠投資生意賺錢發達就要比實力喇。

 

如果你有其他idea，任何疑問，或者已經靠做緊生意賺錢，歡迎留言分享。