如果你曾經向銀行或者財務公司申請咗私人貸款，但個私人貸款申請唔批，而你又真係等錢使，其實你都仲有嘢可以做嘅。首先你要跟住以下幾個步驟了解一下你之前可能做咗d咩令到個申請唔批。
點解銀行或者金融機構唔批你個私人貸款申請？主要有3個原因：
第一：可能你個信貸報告有壞賬，即係話你曾經借過錢，但筆數仲未清。你其實可以查閲你個信貸報告睇下自己個信貸紀錄，但一般嚟講都要收費，不過如果你有銀行確認信話唔批你個貸款申請，你就可以免費查閲你信貸報告一次。詳情點做請你自己聯絡「環聯」問清楚：https://www.transunion.hk/zh/customer-support/contact-us。
第二：銀行或者金融機構審核咗你提供嘅收入、債務狀況等等嘅資料後，認為個還款能力唔夠，所以唔批你份申請。你可能話，你只係要筆數周轉一下，過兩個月都已經可以還到，點解都唔批？我只可以話銀行條數唔係好似你咁計。你每個月嘅收入穩定性比較緊要。
第三：銀行或者金融機構睇過你張月結單或存摺之後，覺得存款能力有問題或者你支出太大。同第二點差唔多，如果你係月光族，證明你都冇額外錢還錢。
香港係有法例規管所有機構或者個人放債時要保障借款人，例如《放債人條例》第24條就釐定任何貸款嘅最高實際利率為年息係60%，但好多時貸款申請唔批都係因爲商業決定多過因爲法律因素，最住要係覺得你冇能力還錢，或者覺得你根本唔會還錢。
你睇到呢度可能心裏面已經開始爆粗閙緊我，話我講咗咁多廢話都唔講應該點搞個私人貸款申請唔批呢單嘢。我而家就講喇。
1. 查閲信貸報告：如我之前第一點所講，你最好查閲一下你份信貸報告。你有可能會發現有d錯誤紀錄，例如你明明從來未申請過渣打信用卡，但份報告就話你有張渣打信用卡有筆3萬蚊卡數未還。即係話一係渣打銀行搞錯咗，一係你就領咗嘢有人用你個身份出咗張卡。真係遇到類似呢d情況時，你就要第一時間去差館落案同埋聯絡間銀行搞掂佢。少少題外話，其實有d銀行係有保安漏洞，騙徒係有辦法用其他市民嘅身份證副本就可以申請到信用卡。因為我做過銀行内部嘅調查工作，所以我知呢d騙徒用咩辦法，當然我唔會係度分享。但你都知道你張身份證副本應該好多地方都有，例如銀行、政府部門、電訊公司，你唔知有冇內鬼。所以你都係最好睇睇個信貸報告。
2. 申請原因：你申請私人貸款時，份申請表裏面或者個客戶服務主任會問你申請原因或者貸款用途。如果你答以下是但一個原因，我都敢話百分之百咁肯定你個私人貸款申請一定唔批：買樓首期、開公司、幫公司買儀器或任何商業用途、買股票、做投資、交稅（唔好問我點解，總之我知）。咁銀行會考慮咩原因？有好多，大路d嘅都係屋企裝修、買車、結婚等等。咁你記得下次再申請私人貸款前要唸清楚自己點解要申請喇。
3. 還款期：還款期亦都係其中一個好主要因素。冇錯，你申請貸款個還款期越短，你比嘅利息係相對會少，但你每月個還款金額就會增加，呢個係要害。例如你想借6萬，而每月平息係0.23%，如果還款期係12個月，你每月就要還$5,318，但如果個還款期係60個月，你個每月還款金額就會大大減少到去$1,138。如個你人工係$10,000，咁樣呢兩個唔同嘅還款期就會決定你個申請批定唔批。所以你可以考慮申請個還款期長d，等個貸款批咗先，你日後有多餘錢時（例如出bonus、贏馬等），你可以還翻多d落去個貸款度減少利息。
4. 債務重組：你本身有幾條數係身嘅話，你可能要考慮下做債務重組將幾條數合拼再拖長個還款期，變相將每個月嘅還款額減低。咁你再申請其他貸款時個成功機會就會大d.
5. 債務及理財輔導：有個機構叫《明愛向晴軒》，呢個機構聲稱係有專員去幫助因財務問題，而導致時常感到情緒困擾及不安嘅人，又話有講座咁，又話可以幫你計點條數。我就未有認真去了解過，亦唔知佢可以點幫或者輔導，更唔知要唔要收費，但我都寫出嚟俾大家參考下。
如果你份私人貸款申請唔批，你可以再同銀行傾傾，例如問問將個還款期拖長，個職員就可以幫你試一試再同相關部門傾一傾。我識得有人係咁樣由唔批變批。又或者如果你張信用卡仲有信用額，你可以申請現金透支分期。再唔係就下載個HSBC Payme用將信用卡增值再將結餘轉賬去你自己戶口，變相免費現金透支（但記得還卡數）。如果有物業，你亦都唔一點要申請私人貸款。或者我遲d另外再寫多個post啦。
最後我都想提一提，短時間内申請多個私人貸款會刮花你個信貸報告，咁樣會搞到你仲難借錢。
如果你覺得呢編文章有用，或者你都鍾意睇，麻煩幫忙share出去。如果有任何疑問，歡迎留言。謝謝！
